الأربعاء، 7 سبتمبر 2011

الثلاثاء، 5 أبريل 2011

الناس اللى بتاعت ربنا

بسم الله الرحمن الرحيم

فى ترتيب للموضوعات فدماغى .....لكن الموضوع دا فرض نفسه علية بشكل غير عادى
زى يكون بيت كامل وناقصة عمود واحد صغير مع ان العمود دا صغير وأصغر من البيت لكن البيت ممكن يقع بدون العمود دا
المدونة مخصصة فى الكلام والرغى والنميمة عن أهل الحب عن العلاقة بين الجنسين (العلاقة العاطفية طبعا)
لكن بصراحة لم أستطع ان اغفل الموضوع دا  لان الحب بكل انواعه لا يكتمل ولا يكون أسمه حب أصلا بدون الموضوع دا

مرة  فى شهر رمضان كان بيصلو صلاة التهجد مع ان الواحد ساعات بيكون مقصر فيها ومرة دخلت مسجد من المساجد  وبدأ الأمام القرأة والدعاء
بدأ واحد بصوت حشرجة وبكاء بس مكتوم والتانى كذلك وبعدين أشتغل المسجد كله بالبكاء الا أنا
انا بصراحة كنت نفسى ابكى حسيت أنى قليل عنهم اوى حسيت بأنى فى شىء انا غفلان عنه انا مش واخد بالى منه هو الله
وحب الله
هو انا بعرف ايه عن ربنا يعنى
الجنة والنار والقبر والعذاب وحور العين
لكن هو مش بعرفه اوى
انا بصلى ليه ؟؟؟؟ ايوة علشان اروح الجنة وعلشان مرحش النار وعلشان ربنا يكرمنى ويرزقنى
يعنى بالعربى بصلى علشان مصالحى مش علشان ربنا مش علشان بحب ربنا هو مش غلط انك تصلى علشان عايز تدخل الجنة ومتدخلش النار لكن  أنا نفسى  اصلى علشان ربنا علشان بحب ربنا

حب الله
أصل كل حب ...أساس كل حب .. بداية كل حب.... ومنجاة كل حب
حب لافراق فيه
حب لا عذاب وتعب فيه
كتير أوى لما بشوف واحد ملتزم أو وحدة ملتزمة بغض النظر عن المتشددين أو الممثلين انما الملتزمين بجد بقول يسلام يابخته نفسى ابقى زيه
تعرف الناس اللى بتصلى كل وقت بوقته واللى لما بتتوضى بتتوضى بزمة وبطريقة حلوة واللى بيصلى بخشوع وبطريقة هادية واللى كل كلامه هادىء مش بيتعصب ولا بيتنرفز وتلاقى كل همه ربنا كل كلامه حلال حرام
تعرف دول اللى ناس بتقول عليهم دول بتوع ربنا
يسلاااااااااااااااااااام
تحس ان بتاع ربنا فعلا
بتاع ربنا يعنى ايه ؟؟؟؟
يعنى ربنا لما بيناديه بيلاقيه
يعنى ربنا لما بيبتليه بيلاقيه راضى
يعنى ربنا لما بيرزقه بيلاقيه بيشكر

أنا بعرف شاب كدة كل الناس تقول بهمس دا بتاع ربنا
الناس كلها بعيدة عن ربنا وهو حاسس انه بتاع ربنا مع القليلين بتوع ربنا
وبعرف وحدة بتاعت ربنا
كل البنات بتلبس اللى بالى بالك وهى بتلبس محتشم مش تخلف ولا تشدد لالالالا دا علشان هى بتاعت ربنا
ملك حبيبها...هو اللى بيملك الأمر والنهى

مضايق...........؟
مخنوق...........؟
وحيد..........؟
نفسك تحب وتتحب وتعيش فحب ؟
نفسك تلاقى حد يونس وحدتك؟
حب الله هو البداية
حب الله هو كل حب واساس لكل حب

لما خرجت من المسجد وحسيت انى فعلا مش بحب الله وأنى دموعى حتى مش راضية تطلع مع ان فى ناس ممكن أغنية تخليها تسح دموع
رحت رجعت وسمعت حلقة لعمرو خالد وبدأ كمان هو يدعى ويبكى والناس معاه وأنا برضو ولا متأثر ولا حاجة
ايه اللى حصلى ....؟ يادى المصيبة هو انا مش بحب ربنا ولا ايه ؟

بتحب ربنا....؟ دا سؤال لو سألتهولك الأجابة هتكون كدة
طبعااااااااااااااا بحب ربنا انت بتقول ايه
طيب انا مش هسألك السؤال دا هسيبك تسألو لنفسك جواك وكن صريح واجه الحقيقة علشان تقدر تتغلب عليها
انا كنت هتجنن رحت للكتب  اللى فالمكتبة ادور على شىء للحب  ...لحب الله
نفسى احبه نفسى يكون هو همى وحبى وهو اكبر قصة حب فحياتى
نفسى أصلى وانا مشتاق لكل صلاة
قريت عن رابعة العدوية والصالحين حسيت أنى بعيد علية خالص دول كانو فحب ربنا لهم شأن كبير
قريت وقريت وبعدين الاحساس جوايا زاد هو انا معقول افتقد لحب الله

احيانا بيجيلى وقت بكون فحالة طاعة لربنا كبيرة لدرجة أنى بتمنى انى اموت وأنا فى الطاعة دى
رحت لشيخ وسألت عن حب الله
قال أجمل حب
قلتلو مرة وحدة كدة : انا مش بحب ربنا
بص لية باستغراب بس  سألنى باستغراب: ليه بتقول كدة ......... ربنا بيحب عباده الطائعين حتى العصاة بيحبهم ربنا وبيجيب ندائهم ودعائهم
والحديث يقول كما قال الرسول فيما معناه وأن تقرب عبدى الية بشبر تقربت اليه بزراع والكل عارف الحديث ربنا يتقرب لينا بمقدار اكبر مما نتقرب له نحن.......... ربنا بيحبنا ربنا بيعطينا ويرزقنا ربنا شايفك عارفك حاسس بكل ما فيك حاسس جريان الدم اللى بيجرى فشرايين دمك حاسس بأنفاسك 
ربنا خلقك بأيده ربنا قدر يوم ولادتك ومقدر يوم وفاتك ربنا محيط بيك
ربنا بيدنو للسماء الدنيا ليسأل العباد اللى عايز مغفرة وهداية
ربنا بيمد يده لعباده ليغفر بليل مسىء النهار ويغفر بالنهار لمسىء الليل
ربنا وأنت بعيد هو قريب
ربنا وانت ناسيه هو فاكر
ربنا وانت عاصي ليه هو رحيم بيك
ربنا وانت هاجره هو يتودد
ربنا شاريك وانت بايعه
يااااااااااااااه بحبك يا الله
كلمة بقالها ايام وليالى تدوب فية
وانا بعيد عن ربى

قلت للشيخ عن موضوع البكاء وعن موضوع انى ممكن مكنش منتظم فى الصلاة
فقال: الامر عادى الحب موجود جوانا  بس ممكن احنا مش بنكتشفه الحب التزام بأوامر ونواهى الله الحب عمل الحب طاعة لله
هو دا الحب الحقيقى

انا لغاية دلوقتى نفسى أحب ربنا نفسى ابقى بتاع ربنا
نفسى أحب ربنا اوى اوى
وانت كمان لو عايز تبقى من أهل الحب لازم تبتدى حياتك بكلمة حب صادقة لله وصدقنى الوحدة والخنقة والغربة هتروح هتلاقى كل الحب اللى انت بتتمناه وتترجاه من الدنيا
عايز اوضح حاجة صغيرة .. ممكن فى واحد يقولك حب الله افضل من الحب العاطفى 
يا جماعة حب الله لايقارن بأى حب المفروض اننا نحب كل حاجة فى الله نحب اى شىء لأننا بنحب ربنا .. بتحب حبيبتك مراتك لأنك بتحب ربنا وبتحب اولادك لانك بتحب ربنا وبتحب شغلك وكليتك لأنك بتحب ربنا 
حب ربنا يكون مظلة لكل حب فحياتك هو الحب الكبير اللى حشوه كل حب تانى ممكن يكون فحياتك حب ربنا مش بديل للحب العاطفى ...لا بالعكس دا مكمل للحب العاطفى وهو المظلة اللى بتحافظ على حبك 


عايز تعرف ربنا بيحبك ولا لا .... ؟
واحد سألنى كدة طبعا الفضول خدنى قلتلو اه طبعا 
قال بص حوليك وشوف لو كل حياتك ماشية بما يرضى الله  وفى طاعة يبقى بيحبك أنما لو بقى ..... ها لو بقى .... لو بقى حياتك ماشية بالبركة ووماشية على ما تفرج ودايس فالدنيا ولا حد همك ومفيش طاعة ولا يحزنون  يبقى ربنا مش هقول مش بيحبك هقول ممكن غضبان عليك ودورك أنت بقى تصالح ربنا وتغير من نفسك علشان حياتك تمشى صح
طيب متيجو نحب ربنا بجد من أول وجديد ونبقى ناس بتاعت ربنا بجد
مشوار الميل يبدأ بخطوة
ومشوار الحب  يبدأ بحب الله

الجمعة، 25 مارس 2011

قطة وكلب ...

بسم الله الرحمن الرحيم

انا مرة سمعت عن حيوان اسمه السلعوة
سألت وانتو عارفين بقى انا من ناحية الاسئلة والغلاسة متوصاش
حيوان السلعوة دا يعنى ذئب وكلبة
؟؟؟؟
فحب يوضحلى لما لقانى اتحولت لعلامة استفهام كبيرة كدة ايه اللى جاب الكلاب للذئاب وايه اللخطة دى
فقالى احيانا بيحصل زواج بين ذئب وكلبة او كلب وذئبة  فبينتج عن العلاقة دى  حيوان اسمه السلعوة واخد من صفات الذئاب والكلاب
يعنى ازاى بيحصل كدة هل ممكن يتجوزو نوعين مختلفين يعنى من الحيوانات
قالى يييييييييييييييه كتير اوى  بتكون حاجة نادرة وخارجة عن الطبيعة شوية
قلت حب يعنى ولا ايه
ضحك واخينا دا لما بيضحك بيميل بجسمو كله لورا كان هيقع من كتر الضحك قال يعنى زى كدة

فيه اسطورة عند الفراعنة من ناحية السلعوة اللى بيشوف قناع بيلبسوه الفراعنة ليه شكل زى الذئب كدة
اللى هو دا
القناع دا بقى هو  شكل السلعوة
كان الفراعنة بيعتقدو انها نتاج لقصة حب بين اتنين من الالهة بتعوتهم اله بشكل ذئب والتانى بشكل كلبة
الظاهر الحكاية قديمة
انا ممكن اتكلم عن حب بين الحيوانات وتعدوها وتقولو ماشى بس توصل للدرجة دى
ممكن تقولو دا زودها اوووووى
هو الحب بيعمل المعجزات حتى عند الحيوانات

شفت حيوان بيقولو عليه البغل
رحت لاخينا ... اخينا فاكرينو ..ايوة ايوة هو اللى بيضحك ويميل لورا
سالتو عن البغل
فقالى انها برضو زى السلعوة زواج حصان لحمارة او حمار لحصانة
ازاى... مترتبة يعنى
قال لا مترتبة ازاى فيه سعات بتبقى مترتبة من ناس وفيه حالات كتير مش مترتبة
قلتلو ياااااه على كدة الحب مفيش فروق عند الحيوانات مش زينا الفروق مبهدلة الحب يعنى ممكن اى اتنين يتجوزو بمجرد مبيحبو بعض حتى لو مختلفين  عن بعض
ضحك بقى من كلامى ومات من الضحك ومال لورا وهو بيضحك لغاية متقلب ووقع
اخينا دا دكتور بيطرى  اهو دعاية ليه اللى معاه حيوان مريض ولا حاجة علاجو علية

خلينا فالمهم
سمعت مرة فيلم كرتون لسة فاكرو لغاية دلوقتى
بيتكلم عن قصة حب بين قطة وكلب
كنت فاكر ان دا بيكون فالخيال والكارتون بس
بس الظاهر الحب اكبر مما نتخيل وان الحب اسطورة فعلا
شوف حب قطة لكلب وهتقول سبحان الله والحمد لله
سبحان الله على انه  بيألف بين القلوب
مع ان المعروف ان القطة والكلب كائنين اعداء
والذئب والكلبة اعداء
لكن مع الحب مفيش حاجة اسمها عداوة

الخلاصة اللى عايز اقولها من دا كله
الحب ثم الحب ثم الحب
عايز تعيش صح ملكش حجة خلاص مفيش غير الحب
واللى ضد الحب وبيقول انه  مش موجود ملكش حجة  مفيش غير الحب
اللى حياته مفيهاش حب ناقصو كتير اوى
اللى مش من اهل الحب ناقصو كتير اوى اوى
الحب حياة
الحب مش زى ما انت فاكر الحب حاجة اعظم مما تعتقد

ياجماعة والله مفيش حل لكل مشاكلك غير الحب
مفيش حاجة تسعدك الا الحب
مفيش حاجة تنجحك الا الحب
مفيش حاجة تلقى بيها وفيها نفسك الا الحب
هقولها تانى لانها عجبتنى
الحب ثم الحب ثم الحب

انا دلوقتى هسيبكم مع فيديوهات هتشوفو فيها عجائب..........تمنياتنا برحلة سعيدة فى عالم الحب مع تحيات الدكتور البيطرى اللى بيوقع كل ما بيضحك .. انا مش عارف اعمل فيه ايه بحاول مخليهوش يضحك لانه لما بيضحك بيميل لورا وبيوقع فبفكر لو هيضحك ينام احسن يضحك وهو نايم يكون اريحلو ههههههههههههههههه ايه دا باين عليه اتعديت وبقيت اقع انا كمان... اسيبكم مع الفيديوهات

طائر يهدى زوجته هدية بيعبر عن حبه ليها يسلام على الرومانسية

الحب يملىء الكون كله وكل المخلوقات ... وانت لسة ولا ايه ...الارض كلها حب

هو كله حب حب مفيش جد ولا ايه ..؟؟؟؟ هو يعنى الحب هزار شوف يامعلم الدنيا مليانة ازاى حب

الحب يصنع المعجزات

ربنا ميحرهمش من بعض ويارب يخلصهم من الغلس اللى بيصورهم

ايها السادة الكرام نعلمكم ان الرحلة لم تنته بعد مازال هناك المزيد
مازالت الرحلة مع الحب طويلة جميلة حلوة خفيفة
وتحياتى لكل اهالى الحب الكرام
والسلام ختام

الجمعة، 18 مارس 2011

حيوانات حبيبة

دوغرى من غير لف ولا دوران
ممكن تستغرب موضوع النهاردة 
مرة فى الثانوى كنت فين فين ببص من الشباك ففيه شجرة كبيرة امام الشباك وفوق الشجرة خالص عش لغرابين اكيد طبعا ذكر وانثى علشان انا كنت ملاحظ بيض وجو اسرى كدة وانتو فاهمين طبعا يعنى ايه جو اسرى كنت بحب اتفرج على الجو الاسرى من الشباك  ومحدش يفهم كلمة جو أسرى بمعنى غلط
المهم ياسيدى كنت بلاحظ حاجة غريبة اوى ان فى تعاون غريب بين الغراب والغرابة من درجة مشاركتهم فكل شىء مكنتش عارف افرق الذكر من الانثى الا عندما يكون هناك جو اسرى بينهم بس
الاتنين بيرقدو على البيض الاتنين بيبنو العش الاتنين بيدافعو عن العش كنت بحب اشاهد مشاركتهم وبقول سبحان الله
هو الحيوان بيحب؟
يعنى ايه؟؟
يعنى اقصد بيحب زينا مثلا يعنى الحالة اللى بتجينا حالة فريدة بالانسان ولا هى فى كل مخلوق على وجه الارض
ازاى الحيوانات بيتجوزو اقصد يعنى ازاى بيختارو بعض وبيعيشو بمشاركة كدة وازاى بيحافظو على الاسرة وازاى ... وازاى...
بصراحة الموضوع كبير
بما انى قرات كتاب عن الحيوانات وقرات فحكاية الحب والعاطفة وكدة والزواج  فاقدر اوصلكم اللى فهمتو
اول نقطة نتكلم فيها وباختصار ... هل الحيوانات بتملك عاطفة؟؟؟
بالنسبة لحكاية العاطفة دى فالحيوانات بتملك عاطفة فياضة وخصوصا عاطفة الامومة بتظهر فيها جدا


العلماء مرة علشان يقيسو درجة العاطفة وانها ممكن توصل لغاية فين عند الحيوانات جابو قطة وحطوها فناحية وجابو ابنائها وحطوهم فناحية وحطو بينهم سلك كهربائى الام اللى هى القطة حاولت تعدى السلك الكهربائى والعلماء كانو بيزيدو من درجة الصاعق الكهربائى ولكن القطة كانت مستعدة انها تضحى وتسحمل الالم علشان توصل لاولادها
الحيوانات بتملك اكبر عاطفة فى العالم وهى الامومة

هو الحيوان بيشعر يعنى عنده مشاعر وعواطف انت بتقول كلام مش معقول دايما الحيوان عندنا فكرة انه مش بيحس خالص لذلك بنشتم لاى حد بنقوله ياحيوان ياحمار علشان الكائنات دى فمفهومنا انها مش بتحس ولا تشعر لكن فى الحقيقة الكائنات دى حساسة ومرهفة الحس كمان

سمعتو عن الاسد اللى اكل المدرب بتاعو...اكيد سمعتو
بس على فكرة انتو مسمعتوش تكملة القصة
الاسد بعدها مات بشهر او اقل
بيسالو اصحاب السيرك ايه اللى حصل
قالو ان الاسد حس بالندم ومرضيش ياكل او يشرب
كأنه بينتحر من الاحساس بالندم ومات الاسد
 ياضناية حرام والله امانة مش حساس وحبوب



ياجماعة احنا مبيهمناش دا كله احنا بيهمنا الحب الهوى الذكر والانثى
ما احنا بنتكلم اهو وقلنا اننا بنتكلم هل الحيوان بيحس ولا لا
العلاقة الزوجية  فى عالم الحيوان الناس بتعتقد انها جنس بس ملهاش اى جانب عاطفى او روحانى
الكلام دا غلط تماما
العملية بتقوم بطقوس وباسلوب متحضر للغاية
تعرف طرق الحيوانات للزواج ازاى
سمعت الشيخ كشك مرة بيتكلم عن زواج الطيور فبيقول طريقة قبول العصفورة للزواج من عصفور فالعصوفور بيجيب حبة قمح
ويتزين ويتشيك ويروح على سنجة عشرة وريشو متسرح على احدث قصة  ويحط الحباية دى امام العصفورة اللى هو معجب بيها
لو خدتها يبقى ما شاء الله خلاص بقيت مراته من غير مأذون ولاشهود المهم  رضيت بيه اعجبت بيه
البطريق كذلك بيروح بحصاة شىء رمزى برضو للانثى اللى هو معجب بيها وبيحط الحصاة تحت قدميها بكل رقة وحنية لو خدت الحصاة تبقى قبلت انها تعيش معاه لو اعجبت بيه
لو مش قابلة هتاخد الحصوة برضو بس علشان تديلو بيها على دماغو هههههههههه ويطير البطريق يهرب منها مع انو مش بيطير

الغزلان بيتجوزو ازاى...بيقولك بيجى الدور على وحدة وحدة فى القطيع فلو انثى كانت بالغة وهى معجبة بغزال معين   وفيه غزال تانى غيرو معجب بيها وعاوز يتجوزها
يبقى الصراع هيبتدى
يتجمع القطيع كله ويتصارع الاتنين اللى عايزين يتجوزو المزة دى واللى يفوز هو المحظوظ بيها
موضوع الحيوانات كبير
لكن الخلاصة اللى عاوز اقلها
الحب موجود فى كل كائن وموجود فى كل حتى وكل زمن وكل شىء
الحب يملىء حياتنا كلنا
مش حكر على البشر بس لالالالا دا الحيوانات كمان بتحب وعندها احساس
بيقلك ان الذئب لما بتموت مراته او بيفترقو بيزيد عواءه والقطيع يعتبره مات لانه لن يقدر على الصيد تانى فبيفضل يعوى بدرجة زيادة عن كل القطيع لغاية ميصدعهم ويصدعنا حزنا لفراق زوجته

لو انت مش بتحب تبقى بتسير ضد الطبيعة احنا كدة ربنا خلقنا نحب وعايزين نتحب ونعيش حياتنا كلها حب فحب
الموضوع لسة مخلصش ولسة فى عناصر تانية جميلة جدا عن الحيوانات والحب بينهم ومفاجأاااااااااااااااات
بس علشان محدش يمل من القرأة والبوست الكبير


هختم بكلام شبه كلام  احمد  مكى ففيلم طير انت
الحيوانات عالم نقى اوى عمرك شفت فيل ساب مراته علشان مغلباه ومطهقاه فعيشتو
عمرك شفت كلب ساب مراته علشان شكلها مش ولابد
المشاعر هى اللى بتحكم
حبهم من غير مصالح
من غير شروط
حب للحب
مش حب لحاجة تانية
قابيل اتعلم ازاى يدفن اخوه من غراب
متيجو نتعلم ازاى نحب من الحيوانات.
ازاى دى بقى انتظرو البوست اللى جاى
________________________________________________________________________
نصائح عمو حزمبل

دى فقرة جديدة وان شاء الله مستمرة هنقولك نصائح تساعدك ازاى تعرف قيمة الحب فحياتك وكمان ازاى تدخل الحب حياتك وكمان ازاى تحافظ عليه ويستمر معاك ممكن هنبدأ نصايح لطيفة صغيرة لكن كبيرة لما تتبعها
النصيحة الاولى::: اقرأ رويات عبير(اشهر رويات للجيب رومانسية)
دايما تحت مخدتى بتكون فيه رواية من رويات عبير


الأربعاء، 16 مارس 2011

النصف الحلو

بسم الله الرحمن الرحيم

ليه البشر اتخلقو ذكر وانثى؟؟؟
حد يعرف الاجابة على السؤال دا
منا قلتلكم بحب الاسئلة ورخم اوى فى حكاية الاسئلة دى
والله سالت ناس كتير السؤال دا منهم طبعا عمنا الشيخ اللى هيطق منى علشان الاسئلة الكتيرة دى
طيب ياجماعة بالهداوة  وحدة وحدة  نفكر ليه يعنى اتخلقنا ذكر وانثى وتعب القلب دا
لو اتخلق الانسان كائن يتكاثر ويحب مع نفسه كدة مش محتاج لحد كنا على كدة  معملناش المدونة دى وبقينا ندرس ونتغزل فالحب وحلاوة الحب
فى واحد ابن حلال قالى حاجة علمية بمناسبة الموضوع دا وعجبتنى الى حد ما
قالك ياسيدى ان لو الانسان مع نفسو ومقضيها تكاثر ذاتى ومفيش احتياج وكائن يتفاعل مع نفسه
مكنش هيبقى حد عارف ابوه من خالو من عمو من ومن
يعنى ايه ؟؟؟
كان كلنا اول حاجة هنكون شبه واحد  زى بتوع اليابان تقريبا  يعنى هنبقى شكل واحد وتكرار واحد
على فكرة مش شكل واحد بس وصفات واحدة وكلام واحد وتصرفات واحدة كان العالم هيبقى ممل اوووووووى

شفته نعمة ربنا علينا يسلااااااام مفيش شىء فالدنيا مش بيتكون من ذكر وانثى
غير البكتريا والحجات اللى بتتكاثر ذاتيا وشبه بعضها دى

لما كان ادم فى الجنة ....
معلش اليومين دول هتيجى سيرة ابونا ادم كتير شوية
لما كان ابونا ادم فى الجنة كان حاسس بوحدة زى مبيقولو يعنى
ربنا خلق امنا حوا... صحى ابونا من النوم لقى جنبو المخلوق العجيب دا اللى مدوخنا وراه السبع دوخات
لقى مخلوق فيه السعادة والتعب مع بعض فيه الحياة بكل ما فيها
شاف اجمل مخلوق فى الدنيا
وهى حوا
يسلام اول نظرة لابونا لامنا  اكيد حس انه فحلم جميل لكن بعد شوية فاق وعرف ان ربنا خلق المخلوق دا علشان تروح الوحدة من نفسه
المراة مضاد للوحدة .... كلنا بتجينا احاسيس بالوحدة بالفراغ بالملل
دا لان فحياتك مفيش حوا
لانك لسة مكملتش
اقصد يعنى لازم تكمل النص التانى ليك
النص الحلو ياعم دا باعتبار انك النص الوحش

محدش يقدر يعيش وحيد بدون ست بدون حب بدون ام بدون نصو الحلو
تقدر تمشى ونصك التحتانى مش موجود لا طبعا لان رجليك هى اللى بتخليك تمشى
طيب تقدر تمشى  ونصك الفوقانى مش موجود لا طبعا لان راسك هى اللى فيها العين والعقل اللى بيوجهو الجسم لاى وجهة هو عايزها
هو دا بقى دور المراة متقدر تمشى من غيرها لانها هى نصك التانى
نصك الحلو بغض النظر عن كلمة حلو دى

مرة  اخو واحد صحبى ولد كدة صغير مش صغير اوى فالاعدادى يعنى
سالنى سؤال وقالى هو ليه احنا منجذبين للبنات
والبنات بنجذبين للولاد
وليه ربنا خلانى منجذبين
وليه ربنا بيخلينا نحبهم ويحبونا
وليه الاحاسيس والحجات اللى بتحصل للواحد لما بيحب او بيعجب او بيشوف بنت
ليه دا كله يعنى
ليه منكونش مع بعض عادى
لما مثلا اتكلم مع بنت اتكلم معاها عادى من غير ميكون فنفسى حاجة
وليه متكنش الحياة تمشى عادى بينا من غير متكون البنت شىء مختلف يعنى
وليه الانجذاب والتفكير  للبنات كدا

بصراحة انا وصاحبى والشلة ضحكنا والولد ضحك علشان بيدارى كسوفه لانه افتكر اسئلتو مضحكة
لكن فالاخر لما رجعت وفكرت فالاسئلة دى كتنت بجاوب ان الحجات والاحاسيس عادى يعنى  لان دى طبيعة البشر بس برضو لقيت ليه طبيعة البشر فبرضو لقيتنى بقنع نفسى اقول لان ربنا خلقهم كدة لقيت حاجة برضو جوايا تقولى ليه ربنا خلقهم كدة

كرهت كلمة اسمها ليه... بتخلى الواحد يدور ويفكر ويوجع دماغه بحاجات ممكن يكتشف فالاخر انها مجرد مواضيع تافهة
بس قلت ايه تخيلو يا جدعان كدة ان البنت  بقى الشعور ناحيتها واختفى المغناطيس اللى جوانا احنا الولاد وهما البنات
وبقت عادى
يااااااااه دا الدنيا تبقى وحشة بشكل
وكمان محدش هيتجوز لانه مش هيحس بشغف بانو يرتبط بانثى من معشر الاناث دول
وكمان المشاعر والاحاسيس اللى ربنا انعم علينا بيها هى اللى بتخفف علينا هموم الدنيا
وكمان  لو الحكاية بقت عادى ايه اللازمة من وجودهم اصلا بالشكل والطبيعة بتاعتهم

بص من الاخر انا ملاحظ ان ربنا وضع الكون بطريقة اننا نكون كلنا فى احتياج لبعض
الذكر محتاج للانثى
والزوج والزوجة محتاجين للاولاد
والاولاد محتاجين للاب والام علشان يكونو اسرة
والاسرة محتاجة لعيلة كبيرة تنتمى ليها وتحميها ودفيها
والعيلة محتاج مجتمع علشان تتفاعل معاه
والشعب محتاج الشعوب التانية
ومنظومة كبيرة من التبادلات والاحتياجات
ربنا خلق الانسان كائن محتاج
يسعى ليبحث عن من يسد احتياجه

ربنا مخلقش الكون ادم بس خلق كمان حوا علشان ادم يحتاج لحوا ويسعى ليها وحوا تحتاج ادم وتسعى ليه
والسعى دا حركة ونشاط ويوميات وافكار وابتكرات وحكايات وقصص ومسلسلات ومصانع واختراعات وحياااااة باكملها
الارض عمرت  واصبحت على ماهى عليه لاننا محتاجين لبعض
الكون كله محتاج للكون كله
وزى مقلت الاحتياج دا هو اللى عمل تعمير الارض والحياة كلها
بنحتاج للشمس للقمر للزرع للمطر للضل للنور للسما

عرفتو بقى ليه كل دا
ليه ذكر وانثى
وليه حب وزواج ومشاعر حلوة
وليه الاحتياج للاخرين

عموما انت لو فكرت فكل شىء هتلقى ان كل شىء بيسير للهدف اللى ربنا  اخبرنا بيه فى القران وهو تعمير الارض واصلاحها والخلافة فيها

كل شخص ليه مكمل وليه نص تانى وليه شخص تحتاج اليه
تحتاج لاهتمامه
تحتاج لحنانه
تحتاج لحبه
تحتاج لحضنه
تحتاج لوجوده
تحتاج لسماع صوته
تحتاج لنظرته الساحرة
تحتاج .....................................................................................................................

الثلاثاء، 15 مارس 2011

عرفات ...والزمان اللى فات



جبل عرفات



بسم الله الرحمن الرحيم
من غير سلامات ومقدمات ورغى كتير زى مبيقولو الجواب باين من عنوانه
اهل الحب.... يعنى هنتكلم عن ايه مثلا عن الفراخ والمحشى ولا السياسة ولا الدين ولا المجتمع والناس ولا البنات ولا الموضة ولا هنتكلم عن فلان وفلانة وعلان وعلانة ونقضيها نميمة وكلام ورغى كتير
بينى وبينكم احنا هنتكلم فكل اللى فات من اول السياسة لغاية الطبيخ والموضة
اصل الحب دا فى كل حاجة وحاشر نفسه فكل موضوع وكل رواية وكل فيلم وكل اغنية وكل حلم وكل امنية
تبص جواك هتلاقى حب  هتبص براك هتلاقى حب هتبص فوق تلاقى حب هتبص تحت ين شمال برضو هتلاقى حب
كل شىء ليه سكة من الحب وسكة الحب ملهاش عسكرى مرور غلبان شقيان العرق بينزل منه زى المطر ولا كمان مفيهاش اشارة حمرا لالالالا سكة الحب سكة سالكة تحب الدغرى اللى ميهمهوش
هتبص فالقران هتلاقى حب فى الانجيل هتلاقى حب فى التوراة برضو هتلاقى الحب
هتقرا عربى انجليزى ان شا الله لاتينى برضو الحب موجود فى كل لغة وكل جنس وكل لون
هتركب التكتك وتلف القارات السبعة برضو هتلقى الحب
فنومك فصحيانك فحياتك فمماتك هتلقى الحب
اصل الحب دا مش اى كلام وراك وراك يا ما تبقى مكن اهل الحب يا اما بقى ....ز تبقى من اهل الحب برضو اصل اللى مش من اهل الحب ملهوش اهل ولا ليه عيلة ولا حد اصلا عايز يعرفو ولا يبص فوشو

اظن بقى زى مقلتلكم مفيش داعى اقدملكم المدونة ومنهجها وموضوعها لان زى مقلت الجواب باين من عنوانه
اهل الحب....
الحب يا جماعة يتكون من ....
لالالالالالا مليش انا فالكلام دا بتاع التعريف ويتكون من وعناصر وفلسفة وحوارات وبتاع وكلام نعناع
لا انا لية فانى ارغى معاكم عن الحب وطعامة الحب وحلاوة الحب واهل الحب
مع انى فالواقع مش بحب اتكلم كتير لكن لو الحكاية عن الحب والرومانسية والمشاعر والعواطف تبقى الاعدة هتحلو والكلام هيطووول وعايزين دور شاى لالالا دور شربات لكل اهل الحب اللى معانا وصلحوووووو

سالت يا جماعة عمكم الشيخ
وانا بصراحة بسأل كتير  بعمل بمنطق اسال استشير..... وعلى راى واحد عالم كبير زمان بيقول ان اللى يسال كتير يعرف كتير
سالت عمكم الشيخ عن يوم عرفات وجبل عرفات وليه بقى اسمه عرفات وليه وازاى وقعدت ارخم عليه بالاسئلة لانى يومها كنت صايم وهو صايم فمكناش احنا الاتنين طايقين بعض فكنا هنتخانق و.... يووووه كنت هتوه فالكلام عن موضوعنا الاصلى

المهم قالى معلومة حلوة اوى
ان جبل عرفات دا هو الجبل اللى اتقابل ابونا ادم مع امنا حوا
اصل الحكاية ايه لما سيدنا ادم اكل التفاحة اللى كلنا عارفين قصتها فربنا امر بانهم ينزلو من الجنة الى الارض
فلما نزلهم نزل سيدنا ادم فحتة من الارض وامنا حوار فحتة من الارض منزلهمش مع بعض فحتة وحدة لحكمة عند ربنا
فابونا ادم فضل يدور على امنا حوا ..... جهااااد لالالا اقصد حوا انتى فين يا حوا
لغاية متقابلو عن جبل عرفات
ملحوظة: المعلومات دى على مسؤلية الشيخ انا راجل غلبان لازم اقول الله اعلم لانى سمعت الحكاية دى وغير واثق من صحتها مية المية بس هى منتشرة لانى سمعتها من كذا شيخ ومن كذا واحد والله اعلم تانى مرة
نرجع لموضوعنا  يااااااااااااااه انا قلت كدا ياااااااااااااااااااه يوم عرفات اللى كله روحانيات اللى يوم بسنة مضت وسنة جاية اليوم العظيم دا يبقى بالرومانسية دى
وليف بيدور على وليفته اللى كانو متفرقين واجتمعو يوم لقاء الحبايب بيكون يوم عظيم بالشكل دا الحمد لله على نعمة الاسلام

يوم عرفات اتبدل فى نظرى حبيت اليوم الرومانسى الجميل دا محستش يومها بالجوع ولا العطش
تخيل سيدنا ادم وهو بيدور على امنا حواء اكيد بيسافر بينادى عليها فكل مكان  هنا وهناك وهى برضو
خايف عليها فالعالم دا اللى هما الاتنين فيه بس
مشتاق ليها مهما غلطو مع بعض برضو بيدور عليها فالحلوة والمرة مع بعض اقصد فالجنة والدنيا مع بعض
ولما يجتمعو يجتمعو فمنطقة وحدة وفى جبل واحد كانه ربنا سيرهم للمنطقة دى والجبل دا فى نفس الوقت
يااااااااه ولا الافلام العربى ولا حتى حد يقدر يجيبها فاى فيلم دى من الافلام الرومانسية

يابخت ابونا ادم
اول اتنين  يعيشو الحب فى الدنيا
لانهم هما اول اتنين فى البشرية
هو اول واحد قال كلمة بحبك سواء اختلفت اللغة او اختلف المرادف ولكن الاحساس نفسة هو اللى بيصاحب كلمة بحبك
الرعشة والابتسامة الحلوة وعينك تفضل تلمع ووشك يضرب الوان وقلبك كانه ناقص يطلع ينط من جوة صدرك وشعرك يقف وتحس كدة بحالة حلوة بتصاحب الكلمة دى
حوا يابختها هى اول وحدة تتقالها الكلمة دى وتقول الكلمة دى
يااااااااه حد فيكم خد باله من كدا اول لحظة تتقال فيها كلمة بحبك فى الكرة الارضية
انا حاسس والله اعلم انه قالها  عند جبل عرفات لانهم على حسب الشيخ اتقابلو هناك
المكان دا قيمتو كبيرة اوووووى تخيلو
ابونا ادم وامنا حوا
كانو فى العالم دا لوحدهم مفيش حد معاهم يمكن  ميكنش فيه غير الحيوانات والطيور وبعد شوية هيجى اولادهم اللى هما احنا يزحمو الدنيا كلها
اول كلمة حب
اول همسة شوق
اول مسكة  ايد  برومانسية
اول بوسة فيها حب وحنان
اول..................................  اكمل النقط
يا جماعة فيه ايه مالكم انا بتكلم عن ابويا وامى اللى هما ابوكم وامكم اصل احنا اخوات
وكمان بتكلم فى الحب وكل اللى بتكلم فيه حلااااااال حلااااااااال

ممكن اسئلكم سؤال ياجماعة؟؟؟؟؟ منا قلتلكم انى بحب اسأل كتيرررررر
حد سال او يعرف من بعيد لبعيد حتى ان فيه قصة حب بين ابوه وامه او باباه ومامتو علشان بس الناس الهاى
ايه بتقول ايه عيب عيب اللى انت بتقوله دا استغفر الله العظيم ابويا وامى كبار فالسن
هو يعنى الحب للعيال فقط
زى ما فيه  حاجات للكبار فقط بقى الحب للعيال فقط بتوع الثانوى والاعدادى يعنى
لا انت بتهبب ايه حب ايه الجدع دا بيقول عليه يا جماعة حد يخبطو على نفوخو ولا حاجة شغال يرغى فكلام ملهوش معنى الحب عيب اهلينا محترمين ملهمش فالمسخرة دى
مسخرة؟؟؟؟؟ ايه ياجماعة دا انا بقول هو بيحب مراته بيحبها بيودها  هو انا بقول حاجة عيب ولا كخ وعيب
اسكت ياولا بطل تخاريف بلا حب بلا كلام فارغ اصلك واد طرى بتاع دباديب واغانى رومانسية وسرحان وكدة جاتكو القرف مليتو البلد مش شايفين غير الحب معاكم شفلكم حاجة تنفعكم
كلام فارغ؟؟؟ لالالالا الظاهر انا غلطت فالعنوان يا جماعة انا بتكلم عن الحب مش على حاجة قلت ادب ولا مياعة دا الحب اجمل حاجة فى الدنيا دى يا جماعة
حراااااااااام اسكت يا زنديق يا كافر بتحث الناس على الفساد والكفر عايز كل واحد صايع زيك يطلع مع وحدة فاجرة زيو ويروحو الكورنيش وياكلو ترمس وسودانى
لالالالا ايه بقى هتودونى النار  وانا قاعد كدة لالالا ياعم انا بتكلم عن الحب مش بتكلم عن حاجة حرام ولا عيب وايه  بقى حكاية الكورنيش والفول

اسال امك وابوك ييييييه اقصدك مامتك وباباك وشوف فيه حب بينهم ولا لا
اجاوب انا عنكم بصراحة بقى مش هتلاقى فيه حب
هتلاقى اللى متجوز بنت عمه جواز عائلات
وهتلاقى اللى متجوز بنت خالته
زميلته فالشغل
بنت الجيران حتى بنت الجيران ممكن ميكنش جواز حب بيكون يعنى غالبا تصليح غلطة وانتو ناس واعية وفاهمين

انا قصدى ان الحب مالى حياتنا من اول ابونا ادم وامنا حبيبتنا حوا
الحب هو بداية الحياة هو اساس الاخرة قبل الدنيا
مين مش محتاج للحب مش مش بيقول بينو وبين نفسه ان نفسو يحب وبيتمنى انه يعيش الحب
كلنا بنقول نفسنا نحب ونتحب
كلنا بندور على الحب زى ما ابونا ادم دور على امنا حوا
الحب احتياج زى الاكل والشرب انت بدور على الحب زى مبتدور على الاكل والشرب
لازم تعترف بكدة
لازم نعترف بالحب ونعترف ان شىء لانستطيع العيش بدونه
شىء زى الاكسجين اللى فحياتنا بالظبط منقدرش نعيش من غيره سعداء ممكن نعيش من غيره بس هنعيش تعساء شبه ميتين

الحب مش عيب ولا مسخرة وكلام فارغ ولا حرام
الحب هو قيم واخلاق واحترام
الحب هو دين ودنيا
الحب هو الحياة
 ستى وستك جدتى وجدتك اسالهم عن علاقتهم بازواجهم عن حبهم لبعض
انا جدتى مشفتش جدى غير ليلة الدخلة
دا رد معظم جداتنا  وستاتنا
وكان التفاهم مع بعض فى معظم الاحوال بالشبشب والقبقاب والخزرانة والفلكة واحيانا المشنقة
كان سى السيد هو الطاغى على الزمن دا
ودلوقتى ست السيد هى اللى طاغية على الزمن دا
العلاقة بين الرجل والمراة اتحولت من حب وعرفات ورمانسية
الى صراع على السلطة
الى روتين
الى صحوبية
الى حجات غريبة كدة
وبدل الياء مكان الباء فكلمة غريبة هتلقاه برضو انها غربية
الغرب الحب عندهم مادة جسم  بعد ما كان مشاعر واحاسيس
احنا عندنا مشاعر وعندنا احاسيس
بس ملهاش عقل يديرها
لان الحب مش قلب بس
الحب قلب وعقل
ولا ايه يا اهل الحب
قولوووووو للزمان ارجع يا زمان
وياريت كل واحد يكون فى حياته عرفات جديد
وادم اللى هو انت تدور من جديد عن حوا اللى هى انتى تدورو على بعض علشان تتقابلو فى عرفات بتاعكم انتو
انا قررت ان فى حياتى يكون فى عرفات
وانت .....................................؟