الأربعاء، 16 مارس 2011

النصف الحلو

بسم الله الرحمن الرحيم

ليه البشر اتخلقو ذكر وانثى؟؟؟
حد يعرف الاجابة على السؤال دا
منا قلتلكم بحب الاسئلة ورخم اوى فى حكاية الاسئلة دى
والله سالت ناس كتير السؤال دا منهم طبعا عمنا الشيخ اللى هيطق منى علشان الاسئلة الكتيرة دى
طيب ياجماعة بالهداوة  وحدة وحدة  نفكر ليه يعنى اتخلقنا ذكر وانثى وتعب القلب دا
لو اتخلق الانسان كائن يتكاثر ويحب مع نفسه كدة مش محتاج لحد كنا على كدة  معملناش المدونة دى وبقينا ندرس ونتغزل فالحب وحلاوة الحب
فى واحد ابن حلال قالى حاجة علمية بمناسبة الموضوع دا وعجبتنى الى حد ما
قالك ياسيدى ان لو الانسان مع نفسو ومقضيها تكاثر ذاتى ومفيش احتياج وكائن يتفاعل مع نفسه
مكنش هيبقى حد عارف ابوه من خالو من عمو من ومن
يعنى ايه ؟؟؟
كان كلنا اول حاجة هنكون شبه واحد  زى بتوع اليابان تقريبا  يعنى هنبقى شكل واحد وتكرار واحد
على فكرة مش شكل واحد بس وصفات واحدة وكلام واحد وتصرفات واحدة كان العالم هيبقى ممل اوووووووى

شفته نعمة ربنا علينا يسلااااااام مفيش شىء فالدنيا مش بيتكون من ذكر وانثى
غير البكتريا والحجات اللى بتتكاثر ذاتيا وشبه بعضها دى

لما كان ادم فى الجنة ....
معلش اليومين دول هتيجى سيرة ابونا ادم كتير شوية
لما كان ابونا ادم فى الجنة كان حاسس بوحدة زى مبيقولو يعنى
ربنا خلق امنا حوا... صحى ابونا من النوم لقى جنبو المخلوق العجيب دا اللى مدوخنا وراه السبع دوخات
لقى مخلوق فيه السعادة والتعب مع بعض فيه الحياة بكل ما فيها
شاف اجمل مخلوق فى الدنيا
وهى حوا
يسلام اول نظرة لابونا لامنا  اكيد حس انه فحلم جميل لكن بعد شوية فاق وعرف ان ربنا خلق المخلوق دا علشان تروح الوحدة من نفسه
المراة مضاد للوحدة .... كلنا بتجينا احاسيس بالوحدة بالفراغ بالملل
دا لان فحياتك مفيش حوا
لانك لسة مكملتش
اقصد يعنى لازم تكمل النص التانى ليك
النص الحلو ياعم دا باعتبار انك النص الوحش

محدش يقدر يعيش وحيد بدون ست بدون حب بدون ام بدون نصو الحلو
تقدر تمشى ونصك التحتانى مش موجود لا طبعا لان رجليك هى اللى بتخليك تمشى
طيب تقدر تمشى  ونصك الفوقانى مش موجود لا طبعا لان راسك هى اللى فيها العين والعقل اللى بيوجهو الجسم لاى وجهة هو عايزها
هو دا بقى دور المراة متقدر تمشى من غيرها لانها هى نصك التانى
نصك الحلو بغض النظر عن كلمة حلو دى

مرة  اخو واحد صحبى ولد كدة صغير مش صغير اوى فالاعدادى يعنى
سالنى سؤال وقالى هو ليه احنا منجذبين للبنات
والبنات بنجذبين للولاد
وليه ربنا خلانى منجذبين
وليه ربنا بيخلينا نحبهم ويحبونا
وليه الاحاسيس والحجات اللى بتحصل للواحد لما بيحب او بيعجب او بيشوف بنت
ليه دا كله يعنى
ليه منكونش مع بعض عادى
لما مثلا اتكلم مع بنت اتكلم معاها عادى من غير ميكون فنفسى حاجة
وليه متكنش الحياة تمشى عادى بينا من غير متكون البنت شىء مختلف يعنى
وليه الانجذاب والتفكير  للبنات كدا

بصراحة انا وصاحبى والشلة ضحكنا والولد ضحك علشان بيدارى كسوفه لانه افتكر اسئلتو مضحكة
لكن فالاخر لما رجعت وفكرت فالاسئلة دى كتنت بجاوب ان الحجات والاحاسيس عادى يعنى  لان دى طبيعة البشر بس برضو لقيت ليه طبيعة البشر فبرضو لقيتنى بقنع نفسى اقول لان ربنا خلقهم كدة لقيت حاجة برضو جوايا تقولى ليه ربنا خلقهم كدة

كرهت كلمة اسمها ليه... بتخلى الواحد يدور ويفكر ويوجع دماغه بحاجات ممكن يكتشف فالاخر انها مجرد مواضيع تافهة
بس قلت ايه تخيلو يا جدعان كدة ان البنت  بقى الشعور ناحيتها واختفى المغناطيس اللى جوانا احنا الولاد وهما البنات
وبقت عادى
يااااااااه دا الدنيا تبقى وحشة بشكل
وكمان محدش هيتجوز لانه مش هيحس بشغف بانو يرتبط بانثى من معشر الاناث دول
وكمان المشاعر والاحاسيس اللى ربنا انعم علينا بيها هى اللى بتخفف علينا هموم الدنيا
وكمان  لو الحكاية بقت عادى ايه اللازمة من وجودهم اصلا بالشكل والطبيعة بتاعتهم

بص من الاخر انا ملاحظ ان ربنا وضع الكون بطريقة اننا نكون كلنا فى احتياج لبعض
الذكر محتاج للانثى
والزوج والزوجة محتاجين للاولاد
والاولاد محتاجين للاب والام علشان يكونو اسرة
والاسرة محتاجة لعيلة كبيرة تنتمى ليها وتحميها ودفيها
والعيلة محتاج مجتمع علشان تتفاعل معاه
والشعب محتاج الشعوب التانية
ومنظومة كبيرة من التبادلات والاحتياجات
ربنا خلق الانسان كائن محتاج
يسعى ليبحث عن من يسد احتياجه

ربنا مخلقش الكون ادم بس خلق كمان حوا علشان ادم يحتاج لحوا ويسعى ليها وحوا تحتاج ادم وتسعى ليه
والسعى دا حركة ونشاط ويوميات وافكار وابتكرات وحكايات وقصص ومسلسلات ومصانع واختراعات وحياااااة باكملها
الارض عمرت  واصبحت على ماهى عليه لاننا محتاجين لبعض
الكون كله محتاج للكون كله
وزى مقلت الاحتياج دا هو اللى عمل تعمير الارض والحياة كلها
بنحتاج للشمس للقمر للزرع للمطر للضل للنور للسما

عرفتو بقى ليه كل دا
ليه ذكر وانثى
وليه حب وزواج ومشاعر حلوة
وليه الاحتياج للاخرين

عموما انت لو فكرت فكل شىء هتلقى ان كل شىء بيسير للهدف اللى ربنا  اخبرنا بيه فى القران وهو تعمير الارض واصلاحها والخلافة فيها

كل شخص ليه مكمل وليه نص تانى وليه شخص تحتاج اليه
تحتاج لاهتمامه
تحتاج لحنانه
تحتاج لحبه
تحتاج لحضنه
تحتاج لوجوده
تحتاج لسماع صوته
تحتاج لنظرته الساحرة
تحتاج .....................................................................................................................

هناك 11 تعليقًا:

;كارولين فاروق يقول...

ده انت فيلسوف بقي
عموما اللي دايما يسأل ليه
دائما بيكون فيلسوف متعمق
لا يحب قشور الاشياء وكل شئ خلقه
الرحمن له وظيفه وله منفعه وله حكمه
واكيد الرجل محتاج للمرأه والعكس وبدون ذلك
كانت الحياه بلا طعم
سعدت جدا بأسلوبك وواضح انك مدون جديد سوف
يحظي بمتابعين طوابير
بس ممكن تلغي في (الاعدادت)عند(التعليق)
الكلمات التأكيديه عند التعليق علشان بتأخذ
من الوقت وعلشان في ناس اكيد دخلت المدونه ولما بتلقيها مابتعلقش

فيلسوف زمانه يقول...

هههههههههههههه طوابير يبقى على كدة هسمى المدونة فرن عيش
ممنوووووووووووون جدا انتى بجد والله حمستينى للكتابة شوية
وشهادتك شهادة اعتز بيها جدا
فرصة سعيدة جدا مرة تانية

مدونه ما كفايه بقى يقول...

هههههههههههههههههه حلو السؤال ده

انا كنت عارفه الاجابه على فكره بس كنت ناسياها أول ما قريت كلامك أفتكرت على طول هههههههههههه

فعلا سبحان الله الكون كله آيات بس للى يتعظ بقى

مدونه دمها خفيف بجد :)

تقبلنى صديقه لمدونتك أخى

أدام الله الود بيننا

تحياتى لك

سواح في ملك اللــــــــــــــــــه- يقول...

كل شئ في الدنيا سالب وموجب
حتي يتم التفاعل
ومن اجل حركة الحياة
قيس علي ذلك كل شئ

فيلسوف زمانه يقول...

اختى مدونة ما كفاية بقى
المدونة نورت بوجودك فيها
وفعلا اللى يعيش ياما يشوف والكون كله عظات

_________________
اخى سواح فى ملك الله
اللى قلتو انت يعتبر فعلا قاعدة منطقية يقاس عليها
ربنا خلقنا موجب وسالب حتى يتحقق التعادل والتوازن حتى فالذرة اللى خدناها فرابعة ابتدائى النيترون والبرويتون اللى هما داخل النواة واحد سالب والتانى موجب والنواة تتوازن عندما يتحقق معرفش ايه وحكاية كدة
فكل مخلوق اخى لابد ان يتحقق التواز بحكاية الموجب والسالب وشكرا على المتابعة

والله يا جماعة مش عارف اقول ايه المدونة نورت ولا اقلكم اتفضلو اشربو شاى
احنا زارنا النبى النهاردة يادى النور يادى النور

سندباد يقول...

صدقني انا استمتعت هنا جدا وعرفت حاجات كتيرة من مجموعة الاسئلة الكتيرة ده
في حاجات فعلا مهما فكرنا فيها وحطينا ليها تحليلات مش هانقدر نوصل لحكمة ربنا وما اوتيتم من العلم الا قليلا ولكن برضه ميمنعش اننا نفكر ونتدبر في ايات الله
سلمت بنات افكارك

تحياتي

فيلسوف زمانه يقول...

وانا عمال اقول ايه النور دا كله اتارى السندباد هنا
المدونة نورت بوجودك ومرورك الكريم عليها ياسندباد

أمل حمدي يقول...

يا فيلسوف
الاحتياج هو الاساس
الكل يدور في حلقة ليس لها أول من آخر يريد أن يصل ولكنه يظل يدور إلى مالانهاية
هكذا الاحتياج ففي كل مرحلة من حياتنا نحتاج كما ذكرت ولا يتوقف بنا ابدا
سعيدة بمدونتك يا فيلسوف وشكرا لدعوتك الجميلة

فيلسوف زمانه يقول...

انا اسعد بكتير
وفرصة سعيدة
وربنا يجعل كل اعمالنا فى ميزان حسانتنا
امين يارب

♥نبع الغرام♥♪≈ يقول...

الله عليك بجد مدونه جميله اوى تحملى اسمى معانى الحب

طبعآ تشرفت بوجودك عندى ودى مش هتكون الزيارة الاخيرة

معاكم على طول
تقبل مرورى
ايناس

فيلسوف زمانه يقول...

اهلا بيكى فى اهل الحب يا نبع الغرام
وفرصة سعيدة
ونتشرف انك تكونى معانا طبعا