الثلاثاء، 5 أبريل 2011

الناس اللى بتاعت ربنا

بسم الله الرحمن الرحيم

فى ترتيب للموضوعات فدماغى .....لكن الموضوع دا فرض نفسه علية بشكل غير عادى
زى يكون بيت كامل وناقصة عمود واحد صغير مع ان العمود دا صغير وأصغر من البيت لكن البيت ممكن يقع بدون العمود دا
المدونة مخصصة فى الكلام والرغى والنميمة عن أهل الحب عن العلاقة بين الجنسين (العلاقة العاطفية طبعا)
لكن بصراحة لم أستطع ان اغفل الموضوع دا  لان الحب بكل انواعه لا يكتمل ولا يكون أسمه حب أصلا بدون الموضوع دا

مرة  فى شهر رمضان كان بيصلو صلاة التهجد مع ان الواحد ساعات بيكون مقصر فيها ومرة دخلت مسجد من المساجد  وبدأ الأمام القرأة والدعاء
بدأ واحد بصوت حشرجة وبكاء بس مكتوم والتانى كذلك وبعدين أشتغل المسجد كله بالبكاء الا أنا
انا بصراحة كنت نفسى ابكى حسيت أنى قليل عنهم اوى حسيت بأنى فى شىء انا غفلان عنه انا مش واخد بالى منه هو الله
وحب الله
هو انا بعرف ايه عن ربنا يعنى
الجنة والنار والقبر والعذاب وحور العين
لكن هو مش بعرفه اوى
انا بصلى ليه ؟؟؟؟ ايوة علشان اروح الجنة وعلشان مرحش النار وعلشان ربنا يكرمنى ويرزقنى
يعنى بالعربى بصلى علشان مصالحى مش علشان ربنا مش علشان بحب ربنا هو مش غلط انك تصلى علشان عايز تدخل الجنة ومتدخلش النار لكن  أنا نفسى  اصلى علشان ربنا علشان بحب ربنا

حب الله
أصل كل حب ...أساس كل حب .. بداية كل حب.... ومنجاة كل حب
حب لافراق فيه
حب لا عذاب وتعب فيه
كتير أوى لما بشوف واحد ملتزم أو وحدة ملتزمة بغض النظر عن المتشددين أو الممثلين انما الملتزمين بجد بقول يسلام يابخته نفسى ابقى زيه
تعرف الناس اللى بتصلى كل وقت بوقته واللى لما بتتوضى بتتوضى بزمة وبطريقة حلوة واللى بيصلى بخشوع وبطريقة هادية واللى كل كلامه هادىء مش بيتعصب ولا بيتنرفز وتلاقى كل همه ربنا كل كلامه حلال حرام
تعرف دول اللى ناس بتقول عليهم دول بتوع ربنا
يسلاااااااااااااااااااام
تحس ان بتاع ربنا فعلا
بتاع ربنا يعنى ايه ؟؟؟؟
يعنى ربنا لما بيناديه بيلاقيه
يعنى ربنا لما بيبتليه بيلاقيه راضى
يعنى ربنا لما بيرزقه بيلاقيه بيشكر

أنا بعرف شاب كدة كل الناس تقول بهمس دا بتاع ربنا
الناس كلها بعيدة عن ربنا وهو حاسس انه بتاع ربنا مع القليلين بتوع ربنا
وبعرف وحدة بتاعت ربنا
كل البنات بتلبس اللى بالى بالك وهى بتلبس محتشم مش تخلف ولا تشدد لالالالا دا علشان هى بتاعت ربنا
ملك حبيبها...هو اللى بيملك الأمر والنهى

مضايق...........؟
مخنوق...........؟
وحيد..........؟
نفسك تحب وتتحب وتعيش فحب ؟
نفسك تلاقى حد يونس وحدتك؟
حب الله هو البداية
حب الله هو كل حب واساس لكل حب

لما خرجت من المسجد وحسيت انى فعلا مش بحب الله وأنى دموعى حتى مش راضية تطلع مع ان فى ناس ممكن أغنية تخليها تسح دموع
رحت رجعت وسمعت حلقة لعمرو خالد وبدأ كمان هو يدعى ويبكى والناس معاه وأنا برضو ولا متأثر ولا حاجة
ايه اللى حصلى ....؟ يادى المصيبة هو انا مش بحب ربنا ولا ايه ؟

بتحب ربنا....؟ دا سؤال لو سألتهولك الأجابة هتكون كدة
طبعااااااااااااااا بحب ربنا انت بتقول ايه
طيب انا مش هسألك السؤال دا هسيبك تسألو لنفسك جواك وكن صريح واجه الحقيقة علشان تقدر تتغلب عليها
انا كنت هتجنن رحت للكتب  اللى فالمكتبة ادور على شىء للحب  ...لحب الله
نفسى احبه نفسى يكون هو همى وحبى وهو اكبر قصة حب فحياتى
نفسى أصلى وانا مشتاق لكل صلاة
قريت عن رابعة العدوية والصالحين حسيت أنى بعيد علية خالص دول كانو فحب ربنا لهم شأن كبير
قريت وقريت وبعدين الاحساس جوايا زاد هو انا معقول افتقد لحب الله

احيانا بيجيلى وقت بكون فحالة طاعة لربنا كبيرة لدرجة أنى بتمنى انى اموت وأنا فى الطاعة دى
رحت لشيخ وسألت عن حب الله
قال أجمل حب
قلتلو مرة وحدة كدة : انا مش بحب ربنا
بص لية باستغراب بس  سألنى باستغراب: ليه بتقول كدة ......... ربنا بيحب عباده الطائعين حتى العصاة بيحبهم ربنا وبيجيب ندائهم ودعائهم
والحديث يقول كما قال الرسول فيما معناه وأن تقرب عبدى الية بشبر تقربت اليه بزراع والكل عارف الحديث ربنا يتقرب لينا بمقدار اكبر مما نتقرب له نحن.......... ربنا بيحبنا ربنا بيعطينا ويرزقنا ربنا شايفك عارفك حاسس بكل ما فيك حاسس جريان الدم اللى بيجرى فشرايين دمك حاسس بأنفاسك 
ربنا خلقك بأيده ربنا قدر يوم ولادتك ومقدر يوم وفاتك ربنا محيط بيك
ربنا بيدنو للسماء الدنيا ليسأل العباد اللى عايز مغفرة وهداية
ربنا بيمد يده لعباده ليغفر بليل مسىء النهار ويغفر بالنهار لمسىء الليل
ربنا وأنت بعيد هو قريب
ربنا وانت ناسيه هو فاكر
ربنا وانت عاصي ليه هو رحيم بيك
ربنا وانت هاجره هو يتودد
ربنا شاريك وانت بايعه
يااااااااااااااه بحبك يا الله
كلمة بقالها ايام وليالى تدوب فية
وانا بعيد عن ربى

قلت للشيخ عن موضوع البكاء وعن موضوع انى ممكن مكنش منتظم فى الصلاة
فقال: الامر عادى الحب موجود جوانا  بس ممكن احنا مش بنكتشفه الحب التزام بأوامر ونواهى الله الحب عمل الحب طاعة لله
هو دا الحب الحقيقى

انا لغاية دلوقتى نفسى أحب ربنا نفسى ابقى بتاع ربنا
نفسى أحب ربنا اوى اوى
وانت كمان لو عايز تبقى من أهل الحب لازم تبتدى حياتك بكلمة حب صادقة لله وصدقنى الوحدة والخنقة والغربة هتروح هتلاقى كل الحب اللى انت بتتمناه وتترجاه من الدنيا
عايز اوضح حاجة صغيرة .. ممكن فى واحد يقولك حب الله افضل من الحب العاطفى 
يا جماعة حب الله لايقارن بأى حب المفروض اننا نحب كل حاجة فى الله نحب اى شىء لأننا بنحب ربنا .. بتحب حبيبتك مراتك لأنك بتحب ربنا وبتحب اولادك لانك بتحب ربنا وبتحب شغلك وكليتك لأنك بتحب ربنا 
حب ربنا يكون مظلة لكل حب فحياتك هو الحب الكبير اللى حشوه كل حب تانى ممكن يكون فحياتك حب ربنا مش بديل للحب العاطفى ...لا بالعكس دا مكمل للحب العاطفى وهو المظلة اللى بتحافظ على حبك 


عايز تعرف ربنا بيحبك ولا لا .... ؟
واحد سألنى كدة طبعا الفضول خدنى قلتلو اه طبعا 
قال بص حوليك وشوف لو كل حياتك ماشية بما يرضى الله  وفى طاعة يبقى بيحبك أنما لو بقى ..... ها لو بقى .... لو بقى حياتك ماشية بالبركة ووماشية على ما تفرج ودايس فالدنيا ولا حد همك ومفيش طاعة ولا يحزنون  يبقى ربنا مش هقول مش بيحبك هقول ممكن غضبان عليك ودورك أنت بقى تصالح ربنا وتغير من نفسك علشان حياتك تمشى صح
طيب متيجو نحب ربنا بجد من أول وجديد ونبقى ناس بتاعت ربنا بجد
مشوار الميل يبدأ بخطوة
ومشوار الحب  يبدأ بحب الله

هناك 12 تعليقًا:

;كارولين فاروق يقول...

السلام عليكم ورحمه الله وبركاته
موضوع جميل يشمل الصراحه والوضوح
والكلام من القلب
ولكن نصيحتي لك أمران لكي تحب الله داوم علي الصلاه
لان الصلاه هي الصله بين العبد وربه وانقطاع الصلاه
بين الحين والآخر لا يعطي الفرصه الكامله لبث الطمأنينه
اما الامر الآخر عندما تتذكر الله في كل موقف تمر به اكيد
اكيد حبك له سيزيد لان اول خطوه في الحب هو التفكير
سعدت بمقالتك
تحياتي

¤¦¤Ebtehal ¤¦¤ يقول...

اد ايه البوست مش بس كلامه جميل .. كلامه كمان ينفع موضوع لافاقه الناس من غفلتها .. و ده بسبب ان الوضوع احساس شخصس صادق نابع من جواك ..

انا بس عاوزه اقول لحضرتك ..افكرك بالحديث ده

((إذا تقرب العبد إلي شبراً تقربت إليه ذراعاً، وإذا تقرب إلي ذراعاً تقربت منه باعاً، وإذا أتاني يمشي أتيته هرولة)) رواه البخاري.

فا انا شايفه ان اول خطوه العبد بياخدها هو اعترافه انه بعيد عن ربنا ..

مش اعترافه يعني قدام الناس انما مواجهه نغسه بالحقيقه دي ..

ودي خطوه كبيره .. لان في ناس كتير شايفين انهم كده تمام و احسن من غيرهم و دول حتي مش بيفكروا يغيروا من نففسهم و يقربوا لربنا

ربنا يهدينا كلنا و اسفه ع الاطاله =]

ساسو يقول...

موضوع جميل جدا
واجمل ما فيه الصراحه
التقرب من الله هو طريق السعاده
اللي يحب ربنا بجد هيلقا حياته اجمل جنه
تسلم يا جميل

وردة الجنة يقول...

كلام وموضوع جميل اوى

بجد احلى حاجة فى الدنيا طاعة ربنا وحب ربنا

واجمل حاجة فى الدنيا اننا نتوكل على الله وان نسلم له قلوبنا وعقولنا يوجهها كيف يشاء فى طاعته ومغفرته ورحمته

تحياتى لك

فيلسوف زمانه يقول...

عجبتنى اوى يا كارولين حتة ان اول خطوة فالحب هى التفكير والتذكر والتأمل
نصيحتك مقبولة
وشكرا على متابعتك الطيبة

فيلسوف زمانه يقول...

أبتهال..........
اسعدنى تعليقك جدا
وفعلا الاعتراف مهم جدا للجميع اعترف لنفسك
وجزاك الله خيرا

فيلسوف زمانه يقول...

ساسو
تسلمى على تعليقك
وتحياتى ليكى

فيلسوف زمانه يقول...

واجمل حاجة فى الدنيا اننا نتوكل على الله وان نسلم له قلوبنا وعقولنا يوجهها كيف يشاء فى طاعته ومغفرته ورحمته
كلام فوق الرائع
تحياتى

Casper يقول...

كلمات طيبة ودعوة جميلة إلى حب الله الذي هو أطهر حب وأنقى حب

نسأل الله أن يجعلنا ممن يستمعون القول فيتبعون أحسنه
اللهم آمين

_________

خالص تقديري لفكرك وقلمك

فيلسوف زمانه يقول...

المدونة نورت بيك وشكرا جزيلا على تعليقك

Baskouta يقول...

الموضوع ده جميل اوي
ومكنش ينفع امشي من غير ما اقول ان الكلام ده اثر فيا اوي اوي
حقيقي شكرا على البوست الرائع ده

دمت في حب الله

فيلسوف زمانه يقول...

شكرا بسكوتة على ثنائك
وجمعنا الله تحت عرشه فى حبه وحده

شكرا جزيلا